અજાણ્યું નીકળે !
આપણાંથી આપણું આ ઘર, અજાણ્યું નીકળે
'ને પછી, સંબંધ જેવું સ્તર અજાણ્યું નીકળે !
કઇંક હોવું જોઇએ, જે સત્યથી જોડી શકો
સત્ય જેવું સત્ય પણ નહિંતર, અજાણ્યું નીકળે !
મન ખરેખર કઇંનથી, છે માત્ર ઈચ્છાનું નગર
બહાર કરતાં તો અધિક અંદર અજાણ્યું નીકળે !
કેળવી લઉં છું ઘરોબો આંસુઓથી,હરવખત
ઓળખીતાનું વલણ, અક્સર અજાણ્યું નીકળે !
જે નથી એ પામવાની ઘેલછા છે, જિંદગી
હોય એ હોવાછતાં, ભીતર અજાણ્યું નીકળે !
ડૉ.મહેશ રાવલ
1 Comments:
મન ખરેખર કઇંનથી, છે માત્ર ઈચ્છાનું નગર
બહાર કરતાં તો અધિક અંદર અજાણ્યું નીકળે !
-ખૂબ ઊંચી વાત કરી, મહેશભાઈ... બ્લૉગ પણ સુંદર બનાવ્યો છે...
Post a Comment
Subscribe to Post Comments [Atom]
<< Home