અજાણ્યું નીકળે !

આપણાંથી આપણું આ ઘર, અજાણ્યું નીકળે
'ને પછી, સંબંધ જેવું સ્તર અજાણ્યું નીકળે !

કઇંક હોવું જોઇએ, જે સત્યથી જોડી શકો
સત્ય જેવું સત્ય પણ નહિંતર, અજાણ્યું નીકળે !

મન ખરેખર કઇંનથી, છે માત્ર ઈચ્છાનું નગર
બહાર કરતાં તો અધિક અંદર અજાણ્યું નીકળે !

કેળવી લઉં છું ઘરોબો આંસુઓથી,હરવખત
ઓળખીતાનું વલણ, અક્સર અજાણ્યું નીકળે !

જે નથી એ પામવાની ઘેલછા છે, જિંદગી
હોય એ હોવાછતાં, ભીતર અજાણ્યું નીકળે !


ડૉ.મહેશ રાવલ