અધૂરાં ઓરતાં
અધૂરાં ઓરતાં લઈને ફરૂં છું હું
સરાજાહેર,ખુદને આંતરૂં છું હું !
ગમે છે એ નથી મળતું,હકીકતમાં
સતત અણગમતાંને,ગમતું કરૂં છું હું !
વિષય મારો,હવે મારો વિષય ક્યાં છે?
વિષયઆંતર કરીને,વિસ્તરૂં છું હું !
મળી છે જિંદગી પણ એ વકલનીં,કે
મરીને રોજ,પાછો અવતરૂં છું હું !
ખરેખર સાવ સુક્કાં છે બધાં સગપણ
છતાં,લીલાં ગણીને ચીતરૂં છું હું !
બધું બદલાય છે,બદલે દશા ત્યારે
મને,બદલાવ સાથે જોતરૂં છું હું !
નથી કઈં હાથમાં કે ભાગ્યમાં,તો પણ
ભરોસાનાં ભરોસે,પાંગરૂં છું હું !
ડૉ.મહેશ રાવલ
0 Comments:
Post a Comment
Subscribe to Post Comments [Atom]
<< Home