આપે છે...!
અધૂરાં સ્વપ્નનો એકેક પગલે ભાર આપે છે
હવે ક્યાં કોઇ રસ્તો,પર્વનો અણસાર આપે છે ?
નજીવા કારણો,સંબંધ પર સીધી અસર કરશે
ખુલાસા કોણ ખુલ્લેઆમ,વારંવાર આપે છે ?
મળે ત્યારે,મળે છે સાવ અંગતથઇ મને કાયમ
અજાણ્યાથી વધારે દર્દ,ઓળખનાર આપે છે !
ઉતાવળ આપણી,લઈજાય છે શંકા તરફ,નહીંતર
ખુદા તો હર દુઆનું ફળ,તબક્કાવાર આપે છે !
પરસ્પર સાંકળી લેવાય છે બે શ્વાસ વચ્ચે,પણ
મરણનો ખોફ,જીવન જીવવા આધાર આપે છે !
ગણું છું રોજ વ્રણ આશ્ચર્ય વચ્ચે,પીઠ પાછળનાં
જુનાં રૂઝાય ત્યાં,અંગત નવા બે-ચાર આપે છે !
નથી મળતું અપેક્ષિત કઈં,અપેક્ષા હોય છે ત્યારે
અમસ્તાં,લોકો આશ્વાસન ખુલાસાવાર આપે છે !
ડૉ.મહેશ રાવલ
2 Comments:
મળે ત્યારે,મળે છે સાવ અંગતથઇ મને કાયમ
અજાણ્યાથી વધારે દર્દ,ઓળખનાર આપે છે !
ઉતાવળ આપણી,લઈજાય છે શંકા તરફ,નહીંતર
ખુદા તો હર દુઆનું ફળ,તબક્કાવાર આપે છે !
-ખૂબ સબળ વાત !
તબક્કાવાર ખુલાસાઓ જિંદગીના ઘણા ગમ્યા અને એમાં પણ
છેલ્લો શેર તો ખૂબ જ ........
નથી મળતું અપેક્ષિત કઈં,અપેક્ષા હોય છે ત્યારે
અમસ્તાં,લોકો આશ્વાસન ખુલાસાવાર આપે છે !
Post a Comment
Subscribe to Post Comments [Atom]
<< Home