વધાવ્યાં છે !

તને દરિયો ગમે છે પણ અમે તો,રણ વધાવ્યાં છે
ફરે છે તું તરસ લઈને,અમે કારણ વધાવ્યાં છે !

તફાવત આપણી વચ્ચે હજૂ અકબંધ છે,આજે
ઉછેર્યો ધોમ તડકો તેં,અમે શ્રાવણ વધાવ્યાં છે !

મળ્યું જે પણ વરદ્હસ્તે,કર્યું નત્ મસ્તકે સ્વીકૃત
ન રાખ્યાં માન્ય ફૂલો તેં,અમે ઘા પણ વધાવ્યાં છે !

જરૂરી હોય જ્યાં નિર્ણય ત્વરિત નાજુક તબક્કે,ત્યાં
અનુત્તર હોય તું ત્યારે,અમે તત્ક્ષણ વધાવ્યાં છે !

ગણી લઈએ જુના સાથે,નવા બે-ફામ ઝખ્મોને
વધાવ્યા'તા અમે એ પણ,અમે આ પણ વધાવ્યાં છે !


ડૉ.મહેશ રાવલ