હવે જે થાય તે સાચું !


વધે છે વારતા આગળ, હવે જે થાય તે સાચું
ફરી ઘેરાય છે વાદળ, હવે જે થાય તે સાચું !

હતું કે, થઈ ગયો કિસ્સો દફન હંમેશ માટે, પણ
મળ્યો છે એમનો કાગળ, હવે જે થાય તે સાચું !

ફરીથી, શક્ય છે ઈતિહાસ આખો ચૂંથશે લોકો
ઉઘડશે કઈંક જૂના વળ, હવે જે થાય તે સાચું !

ખુલાસા, આજપણ ગઈકાલ જેમજ નહીં ગળે ઉતરે
ગણાશે ગોઠવેલું છળ, હવે જે થાય તે સાચું !

અધિક્તર થાય છે એવું થશે, સંબંધ બાબતમાં
લગાવ્યું દાવપર અંજળ, હવે જે થાય તે સાચું !

દિલાસા દઈને લોકો ખોતરે છે દર્દ, ઉંડેથી
શરૂ થઈ છે ફરી ચળવળ, હવે જે થાય તે સાચું !


ડૉ.મહેશ રાવલ