છે પ્રશ્ન કેવળ એટલો !


ખાતાવહી સરભર નથી, છે પ્રશ્ન કેવળ એટલો
આધાર છે,સધ્ધર નથી, છે પ્રશ્ન કેવળ એટલો !

પ્રત્યેક પાસે આમ તો, છે આગવી ઓળખ-પરખ
જે બહાર, તે અંદર નથી, છે પ્રશ્ન કેવળ એટલો !

અત્યંત નાજુક હોય છે સંબંધ, ભીતર-બહારથી
પણ માવજત નક્કર નથી, છે પ્રશ્ન કેવળ એટલો !

ટોળે વળી સપના દિવસભર, રાતની ચર્ચા કરે
'ને રાત પાસે ઘર નથી, છે પ્રશ્ન કેવળ એટલો !

ઘટના અજુગતી, કેટલી, ક્યારે ઘટે નક્કી નથી
અહીં કોઇને કઈં ડર નથી, છે પશ્ન કેવળ એટલો !

અંગતપણાની આડ લઈ સર્જાય છે વીટંબણા
એ પ્રશ્ન છે, ઉત્તર નથી, છે પ્રશ્ન કેવળ એટલો !

ઘરનાં ગણાતા હોય એ, અપવાદ નીકળે શક્ય છે
પણ ઘર હવે ખુદ ઘર નથી, છે પ્રશ્ન કેવળ એટલો !

જોખમ બનીને ત્રાટકે જે લક્ષ્ય પર-છે ક્યાં હવે?
એ વેણ, એ વેતર નથી, છે પ્રશ્ન કેવળ એટલો !

છે ઈશ્વરીયત સત્ય, 'ને એ સર્વવ્યાપી હોય છે
માણસપણું પગભર નથી, છે પ્રશ્ન કેવળ એટલો !


ડૉ.મહેશ રાવલ