જીવતો ગ્યો !

જે મળી, હું એજ પળમાં જીવતો ગ્યો !
જળ વચાળે ,હું કમળમાં જીવતો ગ્યો !

નામ દઈ ઈચ્છા ઉછેરી, સ્વપ્નદરિયે
'ને પછી ,એના વમળમાં જીવતો ગ્યો !

સગપણો વચ્ચે, નથી આસાન હોતું
એ, પળોજણના અતળમાં જીવતો ગ્યો !

છે ખુમારી આજપણ એવી ને એવી
હું સતત એના જ બળમાં ,જીવતો ગ્યો !

થઈ ગયો છું આમ તો , હું સાવ નક્કર
તોય, કૂણા કોઇ વળમાં જીવતો ગ્યો !

શું હવે ચર્ચા ય કરવી, એ વિષયની
જે વિષયના શૂન્યફળમાં, જીવતો ગ્યો !

જિંદગી સાથે ઘરોબો કેળવી, 'ને
મૃત્યુના અદૃશ્ય છળમાં, જીવતો ગ્યો !

છે પુરાવો એટલો ,માણસપણાનોં
કે બળ્યો, પણ તોય વળમાં જીવતો ગ્યો !

રોજ બદલાતી રહી આ હસ્તરેખા
હું, બદલતાં વર્ષફળમાં જીવતો ગ્યો !


ડૉ.મહેશ રાવલ