કેન્દ્રમાં, તું હોય છે !

જીવન ગણાતી ગોઠવણના કેન્દ્રમાં, તું હોય છે
'ને શ્વાસ જેવી વેતરણના કેન્દ્રમાં, તું હોય છે !

બદલાય છે કેવળ કલેવર ઉપલું, આગળ જતાં
એ વસ્ત્રના બદલીકરણના કેન્દ્રમાં, તું હોય છે !

નિશ્ચિત કરેલું હોય છે ફળ, કર્મ જેવું-જેટલું
'ને કર્મના અમલીકરણના કેન્દ્રમાં, તું હોય છે!

મૃગજળ,તરસ,જળ,સ્વપ્ન,ઈચ્છા,પર્વ,માતમ,લાગણી
ઓળખ-પરખના આવરણના કેન્દ્રમાં, તું હોય છે !

સંભવ નથી કંઈ-ક્યાંય, મરજી ન તારી હોય તો
પ્રત્યેક ક્ષણના અવતરણના કેન્દ્રમાં, તું હોય છે !

ડો.મહેશ રાવલ