કોઇપણ ભોગે !

હવે બસ એકધારૂં થઈ જવું છે, કોઇપણ ભોગે !
ગમે તે થાય, તારૂં થઈ જવું છે કોઇપણ ભોગે !

ચલણ ક્યાં છે હવે, કે અન્યનું થઈ ધન્ય થઈજાવું ?
હવે મારે ય મારૂં થઈ જવું છે, કોઇપણ ભોગે !

હિસાબ જ સાવ ખોટો હોય તો, ક્યાંથી મળે તાળો ?
બધી રીતે બજારૂ થઈ જવું છે, કોઇપણ ભોગે !

ન જાણે કઈ ગણતરીએ મને માણસ બનાવ્યો, તેં
કહ્યું'તું ક્યાં ?- નઠારૂં થઈ જવું છે કોઇપણ ભોગે !

પ્રથા તો મેં ય રાખી છે, નમે એને જ નમવાની
છતાં એકે હજારૂં થઈ જવું છે, કોઇપણ ભોગે !

ડો.મહેશ રાવલ