Saturday, July 12, 2008


ને તું જો પછી !


એકાદ અવસર આપ, ને તું જો પછી
અધિકાંશ ઉત્તર આપ, ને તું જો પછી !

કોણે કહ્યું કે આભને સીમા નથી ?
બે પાંખ સધ્ધર આપ, ને તું જો પછી !

શું થઈગયું જો હાથ કેવળ બે જ છે
આધાર નક્કર આપ, ને તું જો પછી !

એકેક પગલે આવશે શરણે, બધા
પડકાર નવતર આપ, ને તું જો પછી !

મૃગજળનેં જળની જેમ ખળખળતાં કરૂં
કાબૂ તરસ પર આપ, ને તું જો પછી !

મેં કેળવ્યો છે આગવી રીતે મને
અમથું ય નડતર આપ, ને તું જો પછી !

હું હર તબક્કે, હર ક્ષણે છું જોખમી
સંજ્ઞા નવેસર આપ,ને તું જો પછી !


ડો.મહેશ રાવલ

1 Comments:

At 11:27 PM , Blogger વિવેક said...

મેં કેળવ્યો છે આગવી રીતે મને
અમથું ય નડતર આપ, ને તું જો પછી !
-સુંદર શેર...

 

Post a Comment

Subscribe to Post Comments [Atom]

<< Home