ચાલો માણસ-માણસ રમીએ !
ખુલ્લં-ખુલ્લા પળભર, ચાલો માણસ-માણસ રમીએ
લજ્જા મૂકી અધ્ધર, ચાલો માણસ-માણસ રમીએ !
સપનાં સામે, સપનાં જેવું સપનું મૂકી દઈએ
આંખે આંજી ઝરમર, ચાલો માણસ-માણસ રમીએ !
જેનાં નામે તરતો જોયો પથ્થર, સગ્ગી આંખે
પડકારી એ ઈશ્વર, ચાલો માણસ-માણસ રમીએ !
પરસેવે નીતરતાં લથબથ, અડધાં ભૂખ્યા પેટે
પાટા બાંધી નવતર, ચાલો માણસ-માણસ રમીએ !
આંટી-ઘૂંટી જેવાં અમથે-અમથાં સગપણ વચ્ચે
ઉજવી લઈએ અવસર, ચાલો માણસ-માણસ રમીએ !
હોવાની પીડાથી બમણી, નહીં હોવાની ચિંતા
અંગેઅંગ લઈ કળતર, ચાલો માણસ-માણસ રમીએ !
દેખાદેખી, દેખાડો, ને નખશીખ ઈર્ષા, અવઢવ
કાંઠાળા મન તટ પર, ચાલો માણસ-માણસ રમીએ !
ડૉ.મહેશ રાવલ
0 Comments:
Post a Comment
Subscribe to Post Comments [Atom]
<< Home