નક્કી નથી !

ક્યારે સમય પડખું ફરે, નક્કી નથી !
શું બાદ શું વત્તા કરે, નક્કી નથી !

મારા ય ઘરની ભીંત ક્યાં નક્કર હતી?
પોલાણ ક્યારે વિસ્તરે, નક્કી નથી !

ભરતી અમસ્તી જોખમી છે ઓટથી ?
શું ડૂબશે ને શું તરે, નક્કી નથી !

હું તો કહું છું - જિંદગી ચોપાટ છે
કઈ સોગઠી ક્યારે મરે, નક્કી નથી !

ઉંડાણ ઓછું ક્યાં હતું આ આંખનું ?
ત્યાં કોણ ઉંડું ઉતરે, નક્કી નથી !

શ્રધ્ધા ભળે તો થઈ શકે ઈશ્વર, છતાં
પથ્થર તરીકે શું કરે, નક્કી નથી !

સીધા જ રસ્તા હોય એવું ક્યાં હતું ?
પણ, ક્યા વળાંકે છેતરે, નક્કી નથી !

ટોળે વળી છે સામટી ઈચ્છા, હવે
સર્જન-વિસર્જન શું કરે, નક્કી નથી !

પ્રશ્નાર્થ બનતા જાય છે ઉત્તર, સહજ
કઈ ધારણા ખોટી ઠરે, નકી નથી !


ડો.મહેશ રાવલ