સમય ક્યાં હતો !

અર્થ વિસ્તારવાનો સમય ક્યાં હતો
પારદર્શક થવાનો સમય ક્યાં હતો !

જઈ શકાયું નહીં,એ અલગ વાત છે
આમ તો,ત્યાં જવાનો સમય ક્યાં હતો !

શક્ય છે માર્ગ ફંટાય આગળ જતાં
સ્વીકૃતિ આપવાનો સમય ક્યાં હતો !

કોણ,કોના ભરોસે તરી જાય છે
એ વિષય છેડવાનો સમય ક્યાં હતો !

આ જ વેષે મને ઓળખે છે બધા
વેષ બદલાવવાનો સમય ક્યાં હતો !

કૈંક એવા તબક્કે હતી જિંદગી
ફેરવી તોળવાનો સમય ક્યાં હતો !

ઠીક છે આ અજાણ્યાપણું,આમ તો
જાણતલ થઈ જવાનો સમય ક્યાં હતો !


ડો.મહેશ રાવલ