કોને ખબર !

ક્યો રસ્તો ક્યારે વળવાનો, કોને ખબર
કઈ ઘટનાથી ખળભળવાનો, કોને ખબર !

પગલાંની માથે પગલું, પગલું આંધળું
ક્યા પગલે, ક્યાં નીકળવાનોં કોને ખબર !

સપનું, લઈ નીકળે સપનું માણસનામનું
ક્યો માણસ કોને છળવાનો, કોને ખબર!

લઈ મુઠ્ઠીમાં અજવાળું, ખિસ્સે ઘાલવું
દીવો ક્યાંલગ, ઝળહળવાનો કોને ખબર !

ચડતાં,પડતાં,આખડતાં વીતે આયખું
પડછાંયો ક્યાં ઓગળવાનો, કોને ખબર !

દરિયાની અંદર દરિયો, દરિયે નાવડું
કાંઠો કઈ વેળા મળવાનો, કોને ખબર !

ડો.મહેશ રાવલ